A. C. Os Muíños de Oliveira: Novas

Novo éxito

Tue, 08 Jul 2008 08:56:26 GMT

Como xa dixeramos anteriormente, o pasado domingo 6 de xullo celebrábase o Concurso de Baile Tradicional da AX Xacarandaina, no que participaron, na categoría C, a canteira do GBMT da AC Os Muíños de Oliveira, interpretando unha Muiñeira de Carelle.

Tiveron un grupo de acompañamento de luxo: gaita, tambor, bombo, acordeón, pandeireta, botella...

Os rapaces fixérono moi ben, polo que gañaron o 3º PREMIO, e dende aquí dámoslle todos a nosa máis sinceira noraboa.

Seguide así, rapaces!

O FIADEIRO: Galas de Verán

Fri, 06 Jun 2008 10:06:48 GMT

Novo premio das Pandereteiras

Thu, 05 Jun 2008 12:06:38 GMT

O día 25 de Maio, celebrouse o I Concurso de Música Tradicional da A. C. Galanía na vila de Muros.

As Pandereteiras da AC Os Muíños de Oliveira participaron na categoría C, correspondente á media de idades máis alta, na que acadaron o 2º PREMIO.

Por cuestións de axenda polo momento non poderán presentarse a máis concursos de música tradicional, polo que vos animamos a vir ás actuacións do GMBT "Os Muíños de Oliveira" se vos apetece disfrutar un rato da nosa música e o noso baile.

Novos resulados

Mon, 28 Apr 2008 14:56:05 GMT

Este domingo, día 27 de Abril, celebrouse o Concurso de Música Tradicional da A. X. Xacarandaina na cidade de A Coruña.

As Pandereteiras da A. C. "Os Muíños e Oliveira" participaron na categoría D, correspondente á media de idades máis alta, na que acadaron o 2º PREMIO.

A próxima cita será no Concurso organizado pola Asociación Galanía de Muros o 25 de maio.

Novo éxito das nosas pandereteiras

Mon, 14 Apr 2008 00:29:00 GMT

Este domingo, día 13 de Abril, celebrouse o IX Concurso de Música Tradicional da A. X. Xiradela, como cada ano por estas datas, na cidade de Arteixo.

As Pandereteiras da A. C. "Os Muíños e Oliveira" participaron na categoría D, correspondente á media de idades máis alta, na que acadaron o 1º PREMIO.

A próxima cita será no Concurso de Música Tradicional da A. X. Xacarandaina, o vindeiro 27 de Abril.

Se queredes ver o vídeo da súa intervención en dito concurso, así como os de outras edicións, non tedes máis que entrar no seu espacio: http://pandereteiras-oliveira.spaces.live.com, ou pinchar no link do mesmo no noso apartado de "amigos".

Festival Folk de Ventosela

Wed, 26 Sep 2007 10:55:11 GMT

O día 28 de setembro (venres) celébrase o Festival Folk de Ventosela, no Concello de Redondela.

A música correrá a cargo dos seguintes grupos:

"Os Amigos de Pazos" - Música tradicional
"Sobre rodas" - Dúo de zanfonas e voz
"Tabú" - Grupo Folk de Vigo

Homenaxe ó Gaiteiro

Thu, 13 Sep 2007 12:16:17 GMT

Dende a Buxaina dannos a coñecer o programa da Homenaxe ó Gaiteiro deste ano.

Como artistas invitados terán a:

Anacos de buxo

http://usuarios.lycos.es/anacosdebuxo/

Agrupación Folclórica Trompos os Pes

Quempallou

http://quempallou.dajul.com/

A presentación correrá a cargo de Pepo Suevos. O acto celebrarase no Teatro Sala de Concertos Caixanova o sábado 13 de outubro as 19:30h.

A entrada é totalmente de valde e poderanse recoller no Centro Cultural de Coruxo, outra opción é porse en contacto coa organización en a_buxaina@yahoo.es

Paxina Web de A Buxaina --> http://abuxaina.cogia.net

Exposición 25 anos de Xiradela

Wed, 12 Sep 2007 15:38:35 GMT

Dende hoxe e ata o vindeiro día 29 de setembro, permanecerá aberta, na Sala
de Exposicións do Centro Cívico e Cultural de Arteixo, a exposición
"Xiradela 25 anos". Este acto, que forma parte das celebracións do 25º
Aniversario, pretende ser un percorrido pola historia de Xiradela dende a
súa fundación até hoxe, a través de fotografías, vestiario, recortes de
prensa, trofeos, recordos,etc.

Os horarios nos que se poderá visitar a exposición serán os seguintes:

    * De luns a sábados:
          o Mañá: 10:00 a 13:30
          o Tarde: 16:30 a 20:00

Para máis información, consultade o blog:
http://xiradela.spaces.live.com

O Fiadeiro en Vilagarcía

Tue, 04 Sep 2007 10:08:31 GMT

O vindeiro sábado, 8 de setembro, ás 21.00h, o grupo artístico da A.C.F. O Fiadeiro, de Vigo, representará a súa "Gala de X Aniversario" no Auditorio de Vilagarcía.

O espectáculo resume os dez anos de presencia da agrupación viguesa nos escenarios, a través dun percorrido polas pezas que durante este tempo levaron a O Fiadeiro a constituirse como unha das entidades de referencia no baile e música tradicionais do país, pezas todas elas gañadoras de varios primeiros premios en diferentes concursos organizados en diferentes puntos de Galicia.

Baixo o título xenérico de "Esta noite hai unha fía", co cal se desenvolve o espectáculo que O Fiadeiro estrea cada dous anos, músicos e bailadores desenvolverán escenas elaboradas a partir do material recollido en traballos de campo realizados por toda a xeografía galega. Por esta razón a gala pode considerarse representativa da riqueza e variedade da expresión artística da nosa tradición, o cal se fai máis evidente ao tomar en consideración que cada peza é interpretada co traxe tradicional da zona na que foi recollida.

O evento terá unha duración aproximada de unha hora e corenta minutos, tempo durante o cal vinteoito bailadores, seis pandereteiras, seis pandereteiros e oito músicos farán aparición no escenario.

Demostración en Vivo de Cestería Tradicional na Fortaleza de San Sebastián

Wed, 27 Jun 2007 23:25:00 GMT

O Centro de Artesanía Tradicional do Concello de Vigo, realizará o PRÓXIMO VENRES, DÍA 29, unha demostración en vivo no interior da fortaleza de San Sebastián (detrás do Concello) cos seus alumnos de cestería tradicional.

Esta iniciativa é unha das actuacións do CAT de cara a dinamización do Casco Vello, e especialmente do seu barrio alto, unha das zonas máis descoñecidas da nosa cidade pero cun enorme potencial cultural e histórico.

A demostración realizarase entre as 10:00 e as 13:00 horas.

XIV Semana Cultural Abiñadoira

Mon, 25 Jun 2007 13:37:17 GMT

Cava do Millo Corvo

Sat, 16 Jun 2007 13:33:47 GMT

A Asociación Cultural Meiro realizará o vindeiro luns 18 de xuño, a partir das 8 da mañá, a cava do millo corvo, continuando co ciclo do millo corvo, iniciado en maio coa sementeira.

A cava é o primeiro labor que se realiza despois de sementado o gran. Con esta actividade elimínanse as malas herbas e se airea a terra, conseguindo un maior desenrolo das raíces e do milleiro.

A seguinte tarefa a desenvolver será a renda.

NOTA: O tratarse dunha actividade realizada ao aire libre, ésta farase sempre que a climatoloxía o permita.

Para máis información: 637 55 89 57 ou no mail: meirocorvo@gmail.com

O Fiadeiro en Rois

Fri, 08 Jun 2007 23:45:42 GMT

O vindeiro sábado, 9 de xuño, ás 21.30, o grupo artístico da A.C.F. O Fiadeiro, de Vigo, representará a súa "Gala de X Aniversario" no Concello de Rois. O espectáculo resume os dez anos de presencia da agrupación viguesa nos escenarios, a través dun percorrido polas pezas que durante este tempo levaron a O Fiadeiro a constituirse como unha das entidades de referencia no baile e música tradicionais do país, pezas todas elas gañadoras de varios primeiros premios en diferentes concursos organizados en diferentes puntos de Galicia.

O evento, que conta co patrocinio da S.A. de Xestión do Plan Xacobeo, dará inicio ás dez da noite e terá unha duración aproximada de unha hora e corenta minutos, tempo durante o cal vinteoito bailadores, sete pandereteiras, cinco pandereteiros e oito músicos farán aparición no escenario.

Novo éxito das Pandereteiras

Mon, 21 May 2007 12:36:31 GMT

As pandereteiras da AC Os Muíños de Oliveira veñen de gañar o 1º Premio da súa categoría no Concurso de Música Tradicional da A. X. Xiradela, celebrado o 20 de Maio deste 2007 na cidade da Coruña.

Dende a asociación a nosa máis sinceira noraboa.

De novo entre os 3 primeiros...

Mon, 16 Apr 2007 08:51:23 GMT

Onte realizouse no Centro Cívico de Arteixo a VIII Edición do Concurso de Música Tradicional da A. X. Xiradela.

As Pandereteiras da A. C. Os Muíños de Oliveira participaban na categoría D, na que acadaron o 2º PREMIO.

O 1º premio desta categoría foi para "Lilaina" da A. C. Castro de Miño, e o 3º premio para "Donaire" da A. C. Donaire de A Coruña.

A próxima cita será no Concurso de Música Tradicional da A. X. Xacarandaina, na cidade de A Coruña, no próximo més de maio.

Un novo éxito

Tue, 10 Apr 2007 19:26:10 GMT

As Pandereteiras da AC Os Muíños de Oliveira veñen de acadar un novo éxito no III Concurso de Música Tradicional "Concello de Cervo" (Lugo) no que gañaron o 1º Premio na modalidade de Cantareiras.

Os gañadores na modalidade de cuartetos foron "Os Chupacabras", de Viveiro.

A próxima cita das nosas pandereteiras nun concurso deste tipo será o próximo domingo, 15 de abril, no Concurso de Música Tradicional da AX Xiradela, que terá lugar en Arteixo (A Coruña).

Boa sorte compañeiras!

Concurso da A.C. Cantigas e Agarimos

Mon, 19 Jun 2006 10:58:28 GMT

A pesar de non estar no seu mellor día, as pandereteiras da A. C. Os Muíños de Oliveira acadaron un novo éxito neste certame, gañando o 3º premio da súa categoría.

O 1º premio foille outorgado ós Pandereteiros "Eiravella" da A. C: F. O Fiadeiro, de Vigo; e o 2º premio foi para "Velai vén" da A. F. Donaire, de A Coruña.

Non esquezades que teredes unha nova oportunidade para ver ás pandereteiras e ó grupo de baile desta asociación na tarde deste sábado na AA. VV. de San Xoan Poulo.

Concurso da A. X. Xacarandaina

Tue, 30 May 2006 12:45:43 GMT

Este pasado domingo, día 28 de maio, foi a segunda xornada con Concurso de Baile e Música Tradicional da A. X. Xacarandaina, na cidade de A Coruña.

As pandereteiras da asociación Os Muíños de Oliveira acadaron un novo éxito gañando o 1º Premio da categoría D (maiores de 18 anos).

O 2º premio foi para a A. F. Donaire de A Coruña, e o 3º premio para as Veña que Vai de Cangas do Morrazo.

A próxima cita, en canto a concursos se refire, será en Santiago de Compostela; no certame que organiza a A. F. Cantigas e Agarimos o vindeiro 18 de Xuño.

Novos éxitos das pandereteiras

Fri, 14 Apr 2006 16:43:05 GMT

As pandereteiras da nosa asociación levan algúns anos participando en concurso de música tradicional por toda a comunidade autónoma.

A tempada comezou este ano co organizado pola A. X. Xiradela o domingo 9 de abril, no que as nosa pandereteiras acadaron o 3º Premio da súa categoría.

Este xoves 13 de abril participaron tamén no organizado polo Concello de Cervo en Lugo, no que acadaron o 2º premio.

Esperamos que sigan colleitando éxitos.